Andoni Ortuzar Euzkadi Buru Batzarraren presidenteak eta Imanol Pradales Lehendakariak gaur goizean egin dute Alderdi Egunaren bezperan Forondako zelaietara urtero egiten duten bisita. Olatz Arrese eta Gracianne Mirande, biharko ekitaldian hitza hartuko duten Euzko Gaztedi-EGI eta Ipar Buru Batzarraren ordezkariak lagun izan dituztela, Ortuzarrek eta Pradalesek jeltzaleen urteko jai nagusia hartuko duten instalazioak bisitatu dituzte. Osotara 400.000 metro koadroko zabalera hartuko du ospakizunak. Taldeak bere esker ona adierazi die Alderdi Egunak bere sorreratik izan dena izaten jarrai dezan lanean jo eta ke eman dituzten dozenaka boluntarioei, jeltzaleen jaia bakarra baita Europako panorama politikoan. Era berean, Araba Buru Batzarreko lehendakari José Antonio Suso, Bizkai Buru Batzarreko lehendakari Itxaso Atutxa, EBBko idazkari Mireia Zarate eta Antolakuntza Arloko burukide arduradun Joseba Aurrekoetxea ere izan dira ekitaldian.

Biharko mitinerako prestaketa eta entseguak egin ondoren, Ortuzarrek eta Pradalesek topaketa berezi bat izan dute Euzko Gaztedi-EGIko ehunka ordezkarirekin. Bilera egin den toki berean, bihar bertan, Euzkadi Buru Batzarrak Aberri Batzarrari emango dizkio hurrengo Batzar Nagusiaren xehetasunak. Prozesua datorren astean hasiko da, gutxi gora behera sei hilabetez luzatuko da eta amaitu egingo da EBBren presidente eta zortzi burukideak aukeratzearekin. Euzkadi Buru Batzarrak Aberri Batzarrari emango dizkio ezagutzera alderdikideek datozen hilabeteotan aztertu beharko dituzten agiri politikoak. Ortuzarrek xehetasun hauek guztiak ezagutaraziko ditu biharko mitinean. Ekitaldi politikoa 12:00etan hasiko da.