Batzar Nagusietan egindako kontrolerako plenoan, asteazken honetan, Ana Otadui Batzarretako presidenteak adierazpen instituzionala irakurri du plenoa hasi baino lehen; izan ere, Bizkaiko Batzar Nagusiek ‘solidaritate osoa’ agertu diete Derioko Eaton enpresako langile guztiei, baita enpresa-laguntzailei ere, “multinazionalak hartutako erabakia dela eta. Erabaki horrek enpresaren deslokalizazioa ekarriko du eta ondorioak izango ditu langileentzat eta Txorierriko eskualdearentzat. Halaber, Bizkaiko Batzar Nagusiek langileek eta bere senitartekoek egindako lanari babesa agertu diote enpleguaren eta bere jarduera industrialaren alde Bizkaian.

Gainera, Eusko Jaurlaritza, Bizkaiko Foru Aldundia eta Derioko Udala instituzioei eskatu diete “Eaton enpresako langileekin elkar lan egiten jarrai dezatela irtenbideren bat lortzeko, eskualdeko pertsonen eta langileen interesen alde”.

Azkenik, Bizkaiko Batzar Nagusiek enpresaren zuzendaritzari bidaliko diote adierazpen instituzional hau, baita enpresaren batzordeari, Bizkaiko Foru Aldundiari eta Jaurlaritzari ere.

Eaton multinazionalak material elektrikoa egiten du eta Derioko enpresaren batzordeari langile-kopuruaren erdia kaleratzea proposatu zion (50 pertsona inguru). Halaber, enpresaren oinarrizko ekoizpena Errumaniara pasatzea eskatu zuen.